አንታ ወዲ ኩሎም … ጀጋኑ ኤርትራ

ልዋም ይግበረልካ … ዝኸድካዮ ስፍራ

ካብ ብጻይካ ተስፋይ ተኽለ

ጭልቅዕ ንእስነቱ … ቃልሱ ዝጀመረ

ተማሃራይ ወዲቡ … ህዝቡ ዘበራበረ

ሐርበኛ ተጋዳላይ … ስዩም ወዲ ኤረ

ጻማኡ ከይርኤ’ስ … ከደ’ዶ ተቐብረ።

                  አንጻር መግዛእቲ … ቆሪጹ ዝተላዕለ

                  ብሰንሰለት መቑሕ … ፍጹም ዘይተዳህለ

                  ኹሉ ዝለዓቱ … ተግባሩ ወሐለ

                  ስዩም’ስ ብሐቂ ድዩ  … ስዉእ እተባህለ?

ኤርትራዊ ስሚዒት … ልቡ ተአጒዱ

ብጭቆና ህዝቡ … ነዲሩ ነዲዱ

ነጻ ሐራ ከውጽኦ … ዝሐዞ መንገዱ

መፈጸምታ አብጺሑ … ከይተመልሳ ዓዱ

ስዩም’ስ ይብሃል … ንዘለአለም ከይዱ?

                  እቲ ተሪር ቃልካ … ዝብል ህዝብና

                  ሐንትን ስምርትን… ደሞክራስያዊት ኤርትራና

                  ደጋጊምካ እትብሎ … ዘማዕደናዮ አንጊህና

      መንገዲ ሐርነት’ወ … ናይ ነጻነት ጐደና

                  ተስፋ ንያት ዝህብ … እቲ ድምጺ ጅግና

                  ስጋኻ እንተኸደ … አርሒቑ ካባና

                  ቃልካ ግን አሎ … ዘለአለም አብ መንጎና።

ዓቢ እምባ ኔርካ’ወ … ድፋዕ መጸግዒ

መድፍዕ ዝስቀሎ … ጸላእቲ መጥቅዒ

ስምብራትካ ተሪር … ሐያል ጸፍዒ

ሞያኻ አይውዳእን … ተጻሒፉ ብርዒ

ተጠራጢረ’ምበር … እዛ ሞትካ’ስ እንድዒ።

                  ንሱ ሐደ … ስርሑ ክንዲ ሽሕ

                  ዝአምነሉ ዝብል … ደፋር በሊሕ

                  ዘይዕገት ወንጪፉ … አብ ኩሉ ዝበጽሕ

                  ንሃገር ከብርህ … ከም ሽምዓ ዝመክኽ

                  ሞት’ዶ ጸውዓትካ  … ዝሐለፉ ክትበጽሕ

                  ሞት ጨካን’ወ … ሞት ዘይተመክሕ።

አንታ ወዲ ዓዋተ… ወዲ ከቢረ

ወዲ ራስ ተሰማ … ባህታ ባጥመረ

ወዲ ኢብራሂ ሱልጣን …ሐያል ብዓል ስረ

ወዲ አጅማት በርሀ … ተባዕ ዝተረረ

ወዲ ናስር በ … ህዝቡ ዝጠመረ

ናብ ነጻነት ገጹ … ቃልሲ ዘሳገረ

ኬድካ’ዶ በጺሑ … ናባኻ ቲ’መብረ።

                  ወዲ ደጊያት ሐሰን … ሐጂ ኢማም ሙሳ

                  ከብዱ ዘይሽበር … ሐላው ህዝቡ ጓሳ

                  ወዲ ዝማች ካሕሱ … ፊተውራሪ ወልደስላሰ

                  ነጻነት ምስ በለ … ድሕሪት ዘይተመልሰ

                  ወዲ ደግያት ወልደገርግስ … ደግያት ስብሃቱ

                  ንሐንቲ ኤርትራ’ወ … አንጊሆም ዝኸተቱ

                  እንታይ ድአ … ወደረደካ ንምሸቱ

                  ዘንጊ ፍትሒ ሒዝካ … ዓድኻ ዘይትአቱ

                  ህዝቢ ስልጣኑ ክርከብ … ክለቁ’ቶም ሸፋቱ።

አንታ ወዲ መላእ … ጀጋኑ ኤርትራ

እስላሞም ክስታኖም … ኩሎም ብሐበራ

ደቂ ቖላ ደጋ … መሬታ ምስ ባሕራ

ብዝፈጸምካዮ … ናይ ቃልስኻ ተራ

አመስጊኖም ይፋነዉኻለ’ዉ … ዝኸድካዮ ስፍራ።

                  እንታይ ኮን … ይብሉ’ለዉ እቶም ባራዩ

                  አሳፍሑ … እንተበልካዮም ዝኹርመዩ

                  ሐራ ኩኑ … እንተበልካዮም ኰርዮም ዝጉህዩ

                  ዓዶም ክዝመት … ዝመስሎም ዘጥረዩ

                  ብሐደ ውልቀ ሰብ … ከም ላም ዝጓሰዩ

                  ዓገብ ክንዲ ዝብሉ … ንኹሉ ሐቁ ኢዩ

                  ሽግ ቃልሲ ዝወልዔ … ዓዲ ጓና ተደብዩ

                  አይተርፍን ዓደቦኡ … ብኽብሪ ክመጽእ’ዩ።

Contact Us at:   webmaster@nharnet.com