ብዛዕባ’ቲ አብ ዋሺንግቶን ዲሲ ክግበር ተመዲቡ ዘሎ ህዝባዊ ሰላማዊ ሰልፊ

ካብ ሽማግለ ኤርትራዊ ደሞክራስያዊ ኪዳን ዞባ ሕ/መ/አሜሪካ

ዝተዋህበ መግለጺ

ንነጻነቱን ሐርነቱን ክምህ ከይበለ ዝተቓለሰ ህዝብና፣ ካብቶም አቐዲሞም አርዑት መግዛእቶም ዘንበሩሉ ባዕዳውያን ገዛእቲ ብዘይፍለ መንገዲ፣ እቲ ብኢደ ወነኑ አብ ስልጣን ዝሐኾረ ናይ ህግደፍ ስርዓት፣ አብ ልዕሊ እንግድዓ መላእ ሕብረተሰብና ዝዘርግሖ ዓፋኒ ናይ ጭቆና ምልካዊ መርበቡ ይኸብድን ይመርርን። ስለዝኾነ ከአ አብ ኩሉ ኩርናዓት ናይ ዓለም ዝርከብ ኤርትራዊ ዜጋ ናይ ተቓውሞ ድምጹ ከስምዕ ግድነትን ባህርያውን’ዩ።

ብሕጽር ዝበለ ህሉው ሐቀኛ አተሃላልዋ ኤርትራን ህዝባን ንምጥቃስ፡-

• ሰብአዊ ርሕራሔን ሐልዮት ዘይብሉ፣ ሕገ አልቦ ዝኾነ ጨካን ምምሕዳር ህግደፍ ዝጸልኤ፣ አፍራዪን ተካኢ ወለዶ ዝኾነ ኤርትራዊ መንእሰይ፣ ሃገሩ ኮፍ ዘይተብል ዝረሰነት ሞቕሎ ኮይናቶ፣ ካብአ አርሒቑ ንምህዳም ምድረ በዳታት ክቖርጽ አጻምእ ሑጻ እንዳተሰትየ፣ ውቅያኖሳት ክሰግር ድራር ዓሳታት እንዳኾነ፣ ብሂወት ዝተረፈ ከአ ፈቐዶ ሃገራት ተዘርዩ ናብ ስደተኛ ተቐይሩ፣ ዝዝረወሉን ዝጠፍአሉን ሰዓታት ብምዃኑ

• ስርዓት ኢሳያስ ንዝነበረ ልዙብ ኤርትራዊ ባህሊን ልምዲን ንምድምሳሱ፣ ናብ ብራዕዲ አሜን ኢሉ ዝግዛእ ምህሙን ተምብርካኺ ዝኾነ ሕብረተ ሰብ ከአ ንምቕያሩ፣ ነታ መባእታ ሃገር ዝኾነት ስድራ ቤት ኤርትራ ንምብታናን ንምዝራጋን አብ ዝተዓጥቀሉ እዋን

• ኤርትራ ብሐደ ውልቀ ባእታ ፊን ዘበሎ ዝአወጆ ውሳኔታት እትመሐዳደር፣ ህዝቢ ድምጹ ምስ ዘስምዕ ከም ነውርን ገበንን ዝተቖጽረላ፣ናብ ሕጊ አልቦነት ናይ ሸፋቱ ሕዛእቲ አብ ዝተቐየረትሉ እዋን

• ካብ አብያተ ትምህርትን ሕክምናን፣ አብያተ ማእሰርትን ቅንጸላን በዚሖም፣ ብአማኢት አሽሐት ዝቑጸሩ ንጹሃት ኤርትራውያን ተራ ዜጋታት ይኹኑ፣ ፖለቲከኛታት፣ ጋዜጠኛታት፣ ተመሃሮ፣ ሐረስቶት፣ ደቂ አንስትዮ፣ ብዘይ ሕጋዊ ክስን ፍርዲን፣ ገደብ ዘይብሉ ጊዜን፣  አብ ትሕቲ ጸልማት ዝወረሶ ማእሰርቲታት እንዳተገርፉ አብ ዝበልዩሉ ዘለዉ ሰዓታት፣ ኤርትራዊ ቅልጽሙ አልዒሉ ክምክትን፣ ድምጹ ክብ አቢሉ ተቓውሞኡ ከስምዕን አድላዪ` ጥራሕ ዘይኮነስ እዋናዊ ዝኾነ ሃገራዊ ግዴታኡ ኢዩ።

ነቲ ቀደም ሰሚሩ ባዕዲ ዝሰጎገ ስሙር መኸትኡ ብምሕዳስ፣ ሎሚ’ውን ደጊሙ ቀላጽሙን ድምጹን ብምውህሃድ፣ ንምልካዊ ጭቆና ሐንሳብን ንሐዋሩን ወጊዱ፣ ንነብሲ ወከፍ ዜጋ ዘውሕስ ጽላል ኩሉ ከአ ዝኾነ ፣ ሐቀኛ ደሞክራስያዊ ስርዓት ንምርግጋጽ ዝእምት ድምጹ ንኸስምዕ፣ አብቲ ንዕለት10/30/06 ዓ.ም. አብ ከተማ ዋሺንግቶን ዲሲ ተመዲቡ ዘሎ ሰፊሕ ህዝባዊ ሰላማዊ ሰልፊ ተሳትፎኡ ንኸዕዝዝ ከአ ተዓዲሙ’ሎ።

ሃገርና ኤርትራ ናይ ዝተፈላለየ ባህሊታትን ልምዲታት ኮነ እምነታት ዘለዎም ኤርትራውያን ከምዝኾነት ንምንጽብራቕ፣ ነቲ ሕብረተሰብና ዝሕበነሉ ዝተፈላለየ ባህልና ብዘንጸባርቕ መንገዲ ንምስታፍ፣ ኩሉ ብዘይ አፈላላይ ብሐበራ አብዚ ዝካየድ ናይ ዋሺንቶን ዲሲ ንኽሳተፍ ሃገራውን ሞራላውን ሐላፍነቱ ምዃኑ ከአ ነዘኻኻር።

ቃልስና ክሳብ ፍትሕን ርትዕን አብ ሃገርና ዝረጋገጽ ቀጻሊ ኢዩ!!

ክብርን ዝኽርን ንስዉአት!!

DISCLAIMER:  The author/s  contributed  for this article/opinion and is/are solely responsible for its contents

Contact Us at:   webmaster@nharnet.com