ኣሎ ምሳሌ ዝብል ሞት ከም ኣዳም

             ናህና ግን ንበይናያ ሰራም ጉዳም

             ብተስፋማርያም ወ/ጊዮርጊስ ኖርወይ 13/04/07

          ሰራም ዘበን ወፊርካ ዘይትምለሰሉ ንገዛኻ

          ድሓን ደኾን ይኣቱ እናበሉ ክሻቐሉ ስድራኻ

          ዘይምሕሩ ቀራናት መልኣከ ሞት ስለ ዝጽበዩኻ

          ኣዐርዮም ጠባዮም ስለ ዝፈልጡ ከም ዘጽንቱኻ

          ቁልጭ ክብሉ የምስዩ ክሳብ ብዓይኖም ዝሪኡኻ

                ኣብ ኮንተይነር ዝተዋሓጥኩም ተካሎት ቆልዑ

                ኣደታትኩም ተዓጢቐን ብኽያት ኣቦታት ይነብዑ

                ጎረሮኦም ነቒጹ ደቀይ እናበሉ ስምኩም ክጽውዑ

                ቀም ምባል ሲኢኖም ብድኻም ኣዕንቶም ቆሊዑ

           ባንዴራ ኣምበልቢላ ታይክዓብስ ብጥሙዩ ከብድኻ

           ከም ቋንጣ ዝተጠልጠለ ጨርቂ ዋሕስ ንዘይኮነካ

           ህግደፋዊት ኣርማ እያ ተጠንቀቕ ከይትውሕጠካ

           ከም ሰብካ ተሰደድ ከም ጨው ከይተሕቕቐካ

                   ንሕናስ ተኣሲሮም እናበልና ጥራይ ኢና ነዉሪ

                   ዘረባምበር ኣብ ስደት ኮይና ቁምነገር ዘይነፍሪ

                   ህዝቢ እናተገፍዐ ሱቕ ምባል ዘይመስለና ነውሪ

                   ታይ ይገበርሞ ሓቀኛ ካብ ተሳእነ ኣሪሙ ዘዐሪ

                   ሓሳዊ በዚሑ ኣለኹ እናበለ ዝልኽብጥ ተጻራሪ

          ሎምስ ይኣክል ብህዝቢ ምጽዋት በዚሑና ኮለል

          ሙሽሙሽ ተግባር ነርሕቆ ዋጋ ዕዳጋ ንዕንክሊል

          ኣብ ንጹር ነገር ይትረፍና እንታያሎ ወረ ምባል

          ኩሉ ንፎልጦ ኢና ብንጽህና ኢደይ ኢድካ ንበል

          ሃራፍ ስልጣን ጉሒፍና ሃሰስ ንበል ቀኒዑ ዝጋደል

                    ወይ ሽግርና ባዕልና ንግጠሞ ውልቀ ሰብ ኣይንጸበ

                    ዝሓዝና ዘይብልና ብኣነፈልጥ ተድሪኽና ኣይንተዓበ

                    ኣይንረሳዓዮ ሕቕፎ ህግደፍ ዘሎ ብራዕዲ ዝተኸበ

                    መን ኣሎድዩ በዚ ሎሚ ዘይሓረረ ዓቕሉ ዘየጽበበ?

                 ሕጂ ንበራበር መሬትና ህዝብናን ብኾንቱ ከይዓረበ

                 መርድእ ከይበዝሕ እከለ ሞይቱ ጽባሕ ሓመድ ድበ

          ግን ሓቂግበሮ ሓሊመ ንዓመታ ኽልተሽሕን ሾሞንተን

          ህግደፍ ከምትሓቅቕ ሕድሕዳ ተባሊዓ ከም ትበታተን

          ግዜ ህውከት ክጭረሽ ከም ዝትካእ ሰላም ሰናይ ዘበን

          ከም ዓለምና ኣትሪርና ክንረግጽ መሬትና ብዘይድንን

          ተሃዊኹ ኣይትበሉኒ ዓወትና ግድንዩ ይግበረልና ኣሜን

                        ዓወት ንውጹዕ ህዝብና

DISCLAIMER:  The author/s  contributed  for this article/opinion and is/are solely responsible for its contents

Contact Us at:   webmaster@nharnet.com