ንዝኽሪ ሰማእታትና

ብብጻይ ኣፈወርቂ ኣባይ

 ጨንፈር ፍራንክፈርት ተ.ሓ.ኤ.ሰ.ባ. ሃገረ ጀርመን

                መስዋእቲ ብጾትና ክንዝክሮ

                ፈቐዶ ሩባ ፈቐዶ ሽንጭሮ

                ተሰዊኦም ኣብ ናይ ሃገሮም ምድሪ

                እቲ ዝናኦም ዘልኣለም ነባሪ

                ታርኽ ነይድምሰስ ብቐጠፍቲ

                ኣይትሕከኽን ኢያ ብደምያ ጽሕፍቲ

                ብኣካሎም እንተ ተኸወሉ

                ብታሪኾም ምሳና የዕልሉ

                ኣብ ወጻኢ ይኹን ውሽጢ ሃገር

                ሓንቲ ኢያ ናይ ጅግንነት ደፍተር

                 መርየት ትጽበብ ዋላ ክንዲ ዕንቂ

                 ዝኽውላ የለን እታ ሓቂ

                 ብጉሒላ ገዛኢ ተበኪላ ምድሪ

                 ኣይርሳዕን ኢዩ ናይ ጀጋኑ ሕድሪ

                ሃገር ኣልቢሶማ ናይ ነጻነት ካባ

                ሓውልቶም ክስራሕ ክበቕሎ ዕንባባ

                ታሪኽ ጅግንነቶም ኢዩ መበገሲ

                ህዝቢ ከስተማቅር ስርዓት ደሞክራሲ

               ውዒሉ ሓዲሩ እዚ ዘይተርፍዩ

               ሞያ ሰማእታትና ንሱዩ ፍሬኡ

              ጅግና ስዩም ሎሚያ ዓመቱ

              ጽሒፍካ ነይውዳእ ንታሪኽ ህይወቱ

              ጽዕነት ገዲፉልና ከይዱ ንብጸቱ

              ንሓዝንና ገቢርናሉ ልጓም

              እቲ ዘዋጽእ መደብካ ምትርጓም

              ተጠርኒፍካ ብሓባር ምስጓም

               ክንደይ ተጻሒፉ ክንደይ ተለቒሱ

               ዓመት ኰይኑ ኣበይ ተማሊሱ

              ንበይኑ ኣይከደን ጸዊዑ ኢዩ ብጾት

              ንየማነን ዘውደን ውጉኣት ሓርነት

              ብጽንዓት መትከሎም ዝኾኑ ኣብነት

              መምህር ኣፈወርቂ እኒ መምህር ሓድጉ

              ጀጋኑ ብጾትና ታሪኽ ዝሓደጉ

              ኣብ ስደት መስዋእቲ ኣብ ካሊፎርንያ

              ጅግና ኣቦና ዘውዴ ዝሓደጉ ቅያ

              ብምሉእ ሕልና ክሳዕታ መስዋእቱ

              ጅግና ኣያና እልያስ ክዝክሮ እፈቱ

               ሕድሪ ኵሎም ጀጋኑ ዘየደቅስ

               ወቕቱ ኢዩ ብሓባር ዘቃልስ

               እዚ ከሓዲ ስርዓት ንኸልግስ

               ዲሞክራሲ ኣብ ህዝቢ ክነግስ

               ክብርን ዝኽርን ንሰማእታትና

               ሓድነትን ጽንዓትን ንህዝብና

DISCLAIMER:  The author/s  contributed  for this article/opinion and is/are solely responsible for its contents

Contact Us at:   webmaster@nharnet.com