እንደ ላዶን ብሊን ጋቢኖ !

ሕንጭል ይግኒን ጋብሲ፡ሕንጭል ይንን ክርጝሲ

ጋባ ፍሮ ደምቢ፡ሰገረቲ ንር ከደንሲ

ኒትክ ለኸንደቲ፡ቚጣዂሲ ኣኽን ኢዳዂሲ

ክርጛኻ ሺራዂ ፈረላ፡ደውየቲ መድሮ ላዂሲ።

                 ብሊን ጋቡ እዃርሶ፡ብሊን ጋቡ ደኲያ

                 ፈርሓትሊኻ በረጁ፡ክረሳ ዋዕዮ ድውያ

                 ይማልሲ ዓበሶ፡ገብሪ ሽንክራ ጉድያ

                 ዕደት ሲመር መታን፡ደሽክሊ ዓረብ ጋብያ

                 ፍሪረኩን ናዂሲ እድያ፡ይዂስኻ እውያ

                 ጠፍሓት ጃልድ ገምኒ፡ጠፍሓት ግሪል ክምያ።

ወነነውማ ኪድነና ፡እማ እንጫ ጎለለው

ናጃብ ዋንስቶኻ፡ኣኽኑዂ ናው ይቅደው

መንተልዶ ጋብረጛ፡ዲመሲ ተከው መቅደው

ሓምረጉሰኲ እንኲዂ ወረባ፡ጅእስን ይነት ተልየው።

                 ዕመት ኲጝድና ኣኽላ፡ቱሲሳዂ ጀነትሊ

                 ማዕተብ ሸሉሊኮት፡ወላ ኪሚ ነሓሊ

                 ኣዉዱዂቲ ኣርእምብረ፡ማልስቶግን ባሓሊ

                 ብሪል የመምግራዂ፡ዲወለካ ዓስተሊ።

እንደ ወንተርኖ ቛልንን፡ዳስሊ ኣካ ዓዳትሲ

ቀራብስኻ ምስግድት፡ናከውስኻ ገርጊሲ

ዩኑ ዲዊንማ ፡ሰከትልድ ኒኪሲ

ንኪ ነን ከብተ ፡ሺሽድና ፍሪርሱዂ ሸኮምሲ

በልጛ ማሓከነኲ ፡ኲጝድኖ ማዕተብሲ

ኣዳም ውራ ክመ፡ገምድን ይነት ኒ ናንሲ።

                 አካ ገድና ይነከው ይኑዂ፡ ይኽርጃር ብሊን ጋበኲ

                 ሰማዲት ኒዂ ካረዮ ፡ኒፍርድ ኡሮ ጨበረኲ

                 ክመዋ ደኮነኲ ፡እንገዋ ከብተንኲ

                 እንዲስካ ልኳ ፡ላዂስክ ኒውሲ ጋበኲ

                 ግምሽ ኣብሑር ካርጋ፡እንተ ገቡትል ህምበኲ።

ጀርብደላ ለወትና፡ላንቂ ኲዂሲ ጨደቅቶ

ሻኽዳ ቂር ኪግካ፡ሸኮም ማዕተብ ኲጝቶ

ኲሲ ጋበኲ ይኑዂ፡ንኪ አምበታዂ ደለምቶ።

ሙሴ ዓዋተ

ስዊድን

DISCLAIMER:  The author/s  contributed  for this article/opinion and is/are solely responsible for its contents

Contact Us at:   webmaster@nharnet.com